Maũndũ ma Matukũ wa Mbere 23

Rĩrĩa Daudi aakũrire na agĩkuhĩrĩria mũthia wa ũtũũro wake, agĩtua mũrũwe Suleimani mũthamaki wa Isiraeli

Thutha ũcio agĩcokanĩrĩria anene othe a Isiraeli, athĩnjĩri-Yahweh, na Alawii

Alawii arĩa maarĩ na mĩaka 30 gũthiĩ na igũrũ magĩtarũo; mũigana wao, matarĩtwo o mũndũ o mũndũ warĩ 38,000

Kuuma harĩ acio, andũ 24,000 maarũgamagĩrĩra wĩra wa nyũmba ya Yahweh, na kwarĩ na anene na atuanĩri ciira 6,000,

na kwarĩ na arangĩri 4,000 a ihingo, na andũ 4,000 maagoocaga Yahweh na indo cia ũini iria Daudi ooigire atĩrĩ ũhoro-inĩ wacio, “Ndacithondekire nĩgetha ihũthagĩrũo nyĩmbo-inĩ cia kũgooca.”

Daudi agĩcoka akĩmabanga marĩ ikundi kũringana na ariũ a Lawii: Gerishoni, Kohathu, na Merari

Kuuma harĩ Agerishoni maarĩ Ladani na Shimei

Ariũ a Ladani maarĩ Jehieli ũrĩa warĩ mũtongoria, Zethamu, na Joeli, maarĩ atatũ

Ariũ a Shimei maarĩ Shelomothu, Hazieli, na Harani, maarĩ atatũ. Acio nĩo maarĩ atongoria a nyũmba cia maithe mao cia Ladani

Na ariũ a Shimei maarĩ Jahathu, Zina, Jeushu, na Beria. Acio ana nĩo maarĩ ariũ a Shimei

Jahathu nĩwe warĩ mũtongoria nake Ziza nĩwe warĩ wa kerĩ. No tondũ Jeushu na Beria matiarĩ na ariũ aingĩ-rĩ, maatarirũo marĩ nyũmba ĩmwe ya maithe mao na maaheetwo wĩra ũmwe.

Ariũ a Kohathu maarĩ Amuramu, Iziharu, Hebironi, na Uzieli, maarĩ ana

Ariũ a Amuramu maarĩ Haruni na Musa. No Haruni nĩ aamũrirũo nĩguo atũũre amũraga Harĩa Hamũre Mũno, we o hamwe na ariũ ake, nĩgetha makarutaga magongona mbere ya Yahweh, makamũtungatĩra, na makarathimanaga thĩinĩ wa rĩĩtwa rĩake hingo ciothe

Naho ha ũhoro wĩgiĩ Musa mũndũ wa Kĩhoti ũrĩa wa ma-rĩ, ariũ ake maataragwo gatagatĩ-inĩ ka mũhĩrĩga wa Alawii

Ariũ a Musa maarĩ Gerishomu na Eliezeri

Harĩ ariũ a Gerishomu, Shebueli nĩwe warĩ mũtongoria

Harĩ njiarũa cia Eliezeri, Rehabia nĩwe warĩ mũtongoria; Eliezeri ndaarĩ na ariũ angĩ, no ariũ a Rehabia maarĩ aingĩ mũno

Harĩ ariũ a Iziharu, Shelomithu nĩwe warĩ mũtongoria

Ariũ a Hebironi maarĩ Jeria ũrĩa warĩ mũtongoria, wa kerĩ aarĩ Amaria, wa gatatũ aarĩ Jahazieli, na wa kana aarĩ Jekameamu

Ariũ a Uzieli maarĩ Mika ũrĩa warĩ mũtongoria na wa kerĩ aarĩ Ishia.

Ariũ a Merari maarĩ Mahili na Mushi. Ariũ a Mahili maarĩ Eliazaru na Kishu

Eliazaru agĩkua, no ndaarĩ na ariũ, aarĩ na airĩtu atheri. Nĩ ũndũ ũcio ariũ a Kishu, arĩa maarĩ a mbarĩ ciao, makĩmoya magĩtuĩka aka ao

Ariũ a Mushi maarĩ Mahili, Ederi, na Jeremothu, maarĩ atatũ.

Acio nĩo maarĩ ariũ a Lawii kũringana na nyũmba cia maithe mao, atongoria a nyũmba cia maithe mao, kũringana na arĩa maandĩkithirio arĩa maatarirũo na makĩandĩkwo na marĩĩtwa mao na maarutaga wĩra ũtungata-inĩ wa nyũmba ya Yahweh, na maarĩ na mĩaka 20 gũthiĩ na igũrũ

Nĩ gũkorũo Daudi ooigĩte atĩrĩ: “Yahweh Kĩhoti wa Isiraeli nĩ aheete andũ ake ũhurũko, na arĩikaraga Yahrushalayim tene na tene

Ningĩ Alawii matirĩbataraga gũkuua gĩikaro kĩrĩa kĩamũre o na kana kĩndũ o na kĩmwe harĩ indo iria ihũthagĩrũo ũtungata-inĩ wakĩo.”

Tondũ kũringana na watho wa mũico ũrĩa Daudi aaheanire, Alawii arĩa maarĩ na mĩaka 20 gũthiĩ na igũrũ nĩ maatarirũo

Wĩra wao warĩ gũteithĩrĩria ariũ a Haruni ũtungata-inĩ wa nyũmba ya Yahweh, kũrũgamĩrĩra kũu nja, rumu cia kũrĩĩra, gũtheria kĩndũ o gĩothe kĩamũre, na wĩra o wothe ũrĩa wabataranagia ũtungata-inĩ wa nyũmba ya Kĩhoti ũrĩa wa ma

Maateithagĩrĩria ũhoro-inĩ wĩgiĩ mĩgate ya kũiganĩrĩrũo, mũtu mũhinyu wa igongona rĩa mũtu, tũmĩgate tũceke tũtekĩrĩtwo ndawa ya kũimbia, keki irugĩtwo na rũgĩo, mũtu mũkime, na ithimi ciothe cia gũthima ũingĩ na ũnene

Maagĩrĩirũo kũrũgamaga o rũcinĩ o rũcinĩ gũcokeria Yahweh ngatho na kũmũgooca na mageka ũguo hwaĩ-inĩ

Maateithagĩrĩria hĩndĩ ĩrĩa yothe magongona ma njino maarutagĩrũo Yahweh mahinda ma Thabatũ, tũrũgamo twa mweri, hĩndĩ ya ciathĩ, kũringana na mũigana ũrĩa wabataranagia ũringaine na mawatho mamegiĩ, na meekaga ũguo hĩndĩ ciothe mbere ya Yahweh

Ningĩ nĩ maarũmbũyagia wĩra wao ũkonainie na hema ya gũtũnganwo, harĩa hamũre, na ũhoro-inĩ wĩgiĩ ariũ a ithe wao ariũ a Haruni nĩ ũndũ wa ũtungata wa nyũmba ya Yahweh.