Ndari 3

Na rĩrĩ, ici nĩcio ciarĩ mbarĩ cia Haruni na Musa mũthenya ũrĩa Yahweh aaririe na Musa Kĩrĩma-inĩ gĩa Sinai

Maya nĩmo maarĩ marĩĩtwa ma ariũ a Haruni: Nadabu ũrĩa warĩ irigithathi, na Abihu, Eliazaru, na Ithamaru

Macio nĩmo maarĩ marĩĩtwa ma ariũ a Haruni, athĩnjĩri-Yahweh aitĩrĩrie maguta arĩa maathuurĩtwo matungatage marĩ athĩnjĩri-Yahweh

Ĩndĩ Nadabu na Abihu nĩ maakuire marĩ mbere ya Yahweh rĩrĩa maatwarire mwaki ũtetĩkĩrĩtio mbere ya Yahweh werũ-inĩ wa Sinai, na matiarĩ na kahĩĩ o na kamwe. No Eliazaru na Ithamaru nĩ maathiire na mbere gũtungata marĩ athĩnjĩri-Yahweh marĩ hamwe na ithe wao Haruni.

Yahweh agĩcoka akĩra Musa ũũ:

“Rehe mũhĩrĩga wa Lawii, na ũmarũgamie mbere ya Haruni mũthĩnjĩri-Yahweh, na nĩo marĩmũtungatagĩra

Magĩrĩirũo kũhingagia mawĩra marĩa mehokeirũo mamũrutagĩre, na ma kĩrĩndĩ gĩothe mbere ya hema ya gũtũnganwo na njĩra ya kũruta wĩra wao ũrĩa ũkonainie na gĩikaro kĩu kĩamũre

Nĩo magĩrĩirũo kũrũmbũiya indo ciothe cia hema ya gũtũnganwo na kũruta mawĩra marĩa mehokeirũo kũhingĩria ciana cia lsiraeli na njĩra ya kũrũmbũiya maũndũ megiĩ ũtungata ũrĩa ũkonainie na gĩikaro kĩu kĩamũre

Wagĩrĩirũo kũheana Alawii kũrĩ Haruni na ariũ ake. Acio nĩo maheanĩtwo, makaheanwo kũrĩ we kuuma harĩ ciana cia lsiraeli

Wagĩrĩirũo kwamũra Haruni na ariũ ake, na nĩo magĩrĩirũo kũrutaga mawĩra mao ma ũthĩnjĩri-Yahweh, na mũndũ o wothe ũtetĩkĩrĩtio angĩkuhĩrĩria agĩrĩire kũũragwo.”

Yahweh agĩthiĩ na mbere kwaria na Musa, akĩmwĩra atĩrĩ:

“Na niĩ-rĩ, nguoya Alawii gatagatĩ-inĩ ka ciana cia Isiraeli handũ-inĩ ha marigithathi mothe ma ciana cia Isiraeli, na Alawii matuĩke akwa

Nĩ gũkorũo marigithathi mothe nĩ makwa. Mũthenya ũrĩa ndoragire marigithathi mothe bũrũri-inĩ wa Misiri, nĩ ndeyamũrĩire marigithathi mothe thĩinĩ wa Isiraeli, ma mũndũ na ma nyamũ. Mothe marĩkoragwo marĩ makwa. Niĩ nĩ niĩ Yahweh.”

Yahweh agĩkĩaria o rĩngĩ na Musa werũ-inĩ wa Sinai, akĩmwĩra ũũ:

“Andĩkithia ariũ a Lawii kũringana na nyũmba cia maithe mao na kũringana na mbarĩ ciao. Wagĩrĩirũo kwandĩkithia mũndũrũme o wothe ũrĩ na ũkũrũ wa kuuma mweri ũmwe gũthiĩ na igũrũ.”

Kwoguo Musa agĩkĩmaandĩkithia kũringana na ũrĩa Yahweh ooigĩte, o ta ũrĩa aathĩtwo

Maya nĩmo maarĩ marĩĩtwa ma ariũ a Lawii: Gerishoni, Kohathu, na Merari.

Na rĩrĩ, maya nĩmo maarĩ marĩĩtwa ma ariũ a Gerishoni kũringana na nyũmba ciao: Libini na Shimei.

Ariũ a Kohathu kũringana na nyũmba ciao maarĩ Amuramu, Iziharu, Hebironi, na Uzieli.

Ariũ a Merari kũringana na nyũmba ciao maarĩ Mahili na Mushi. Icio nĩcio ciarĩ mbarĩ cia Alawii kũringana na nyũmba cia maithe mao.

Kuuma harĩ Gerishoni gũkĩgĩa nyũmba ya Alibini na nyũmba ya Ashimei. Icio nĩcio ciarĩ mbarĩ cia Agerishoni

Mũigana wa arũme ao othe arĩa maarĩ na ũkũrũ wa kuuma mweri ũmwe gũthiĩ na igũrũ arĩa maandĩkithirio warĩ 7,500

Mbarĩ cia Agerishoni ciaambaga hema ciao thutha wa gĩikaro kĩrĩa kĩamũre mwena wa ithũĩro

Mũtongoria wa nyũmba ya maithe ma Agerishoni aarĩ Eliasafu mũrũ wa Laeli

Wĩra wa ariũ a Gerishoni thĩinĩ wa hema ya gũtũnganwo warĩ kũrũmbũiya gĩikaro kĩu kĩamũre na hema, na kĩandarũa gĩa gũkĩhumbĩra, mbathia ya mũromo wa hema ya gũtũnganwo,

itama iria icunjurĩte cia nja, mbathia ya mũromo wa nja ĩrĩa ĩthiũrũrũkĩirie gĩikaro kĩu kĩamũre na kĩgongona, tũmĩkanda twa hema, na ũtungata ũrĩa wothe ũkonainie nacio.

Kuuma harĩ Kohathu gũkĩgĩa nyũmba ya Aamuramu, nyũmba ya Aiziharu, nyũmba ya Ahebironi, na nyũmba ya Auzieli. Icio nĩcio ciarĩ mbarĩ cia Akohathu

Mũigana wa arũme othe arĩa maarĩ na ũkũrũ wa kuuma mweri ũmwe gũthiĩ na igũrũ warĩ 8,600; nĩo maarutaga wĩra wa kũrũmbũiya harĩa hamũre

mbarĩ cia ariũ a Kohathu ciaambaga hema ciao mwena wa mũhuro wa gĩikaro kĩu kĩamũre

Mũtongoria wa nyũmba ya maithe ma mbarĩ cia Akohathu aarĩ Elizafani mũrũ wa Uzieli

Wĩra wao warĩ kũrũmbũiya Ithandũkũ, metha, mũtĩ wa kũigĩrĩrũo matawa, igongona, indo iria ihũthagĩrũo ũtungata-inĩ wa harĩa hamũre, mbathia, na ũtungata ũrĩa wothe ũkonainie nacio.

Mũtongoria ũrĩa mũnene wa Alawii aarĩ Eliazaru mũrũ wa Haruni mũthĩnjĩri-Yahweh, na nĩwe warũgamagĩrĩra arĩa maarũmbũyagia mawĩra ma harĩa hamũre.

Kuuma harĩ Merari gũkĩgĩa nyũmba ya Amahili na nyũmba ya Amushi. Icio nĩcio ciarĩ mbarĩ cia Merari

Mũigana wa arũme othe arĩa maarĩ na ũkũrũ wa kuuma mweri ũmwe gũthiĩ na igũrũ arĩa maandĩkithirio warĩ 6,200

Mũtongoria wa nyũmba ya maithe ma mbarĩ cia Merari aarĩ Zurieli mũrũ wa Abihaili. Nao maambaga hema ciao mwena wa rũgongo wa gĩikaro kĩu kĩamũre

Ariũ a Merari maarutaga wĩra wa kũrũgamĩrĩra buremu cia gĩikaro kĩu kĩamũre, mĩgamba yakĩo, itugĩ ciakĩo, makinya makĩo, na indo ciakĩo ciothe, na ũtungata ũrĩa wothe ũkonainie nacio,

o hamwe na itugĩ iria ciathiũrũrũkĩirie nja yothe hamwe na makinya ma cio, mĩcumarĩ yacio ya hema, na tũmĩkanda twacio twa hema.

Arĩa maambaga hema ciao mbere ya gĩikaro kĩu kĩamũre mwena wa irathĩro, mbere ya hema ya gũtũnganwo mwena ũrĩa riũa rĩrathagĩra, maarĩ Musa na Haruni na ariũ ake. Nĩo meehokeirũo kũrũmbũiya handũ harĩa hamũre, marutage wĩra ũcio handũ-inĩ ha ciana cia Isiraeli. Mũndũ o wothe ũteetĩkĩrĩtio angĩakuhĩrĩirie no kũũragwo ooragagwo.

Arũme othe Alawii arĩa maarĩ na ũkũrũ wa kuuma mweri ũmwe gũthiĩ na igũrũ, arĩa Musa na Haruni maandĩkithirie kũringana na mbarĩ ciao o ta ũrĩa Yahweh aamaathĩte, maarĩ 22,000.

Yahweh agĩcoka akĩra Musa atĩrĩ: “Andĩkithia marigithathi ma arũme othe ma ciana cia Isiraeli marĩa marĩ na ũkũrũ wa mweri ũmwe gũthiĩ na igũrũ, ũmatare, na wandĩke marĩĩtwa mao

No mũhaka woe Alawii nĩ ũndũ wakwa—niĩ nĩ niĩ Yahweh—handũ-inĩ ha marigithathi mothe ma ciana cia Isiraeli, na woe nyamũ cia mũciĩ cia Alawii handũ-inĩ ha marigithathi mothe ma nyamũ cia mũciĩ cia ciana cia Isiraeli.”

Musa agĩkĩandĩkithia marigithathi mothe gatagatĩ-inĩ ka ciana cia Isiraeli, o ta ũrĩa Yahweh aamwathĩte

Mũigana wa marigithathi ma arũme othe arĩa maandĩkithirio na marĩĩtwa, arĩa maarĩ na ũkũrũ wa kuuma mweri ũmwe gũthiĩ na igũrũ warĩ 22,273.

Yahweh agĩthiĩ na mbere kwaria na Musa, akĩmwĩra ũũ:

“Oya Alawii handũ-inĩ ha marigithathi mothe gatagatĩ-inĩ ya ciana cia Isiraeli, na woe nyamũ cia mũciĩ cia Alawii handũ-inĩ ha nyamũ ciao cia mũciĩ, na Alawii megũtuĩka akwa. Niĩ nĩ niĩ Yahweh

Nĩ ũndũ wa thogora wa ũkũũri wa marigithathi 273 ma ciana cia Isiraeli marĩa makĩrĩte mũigana wa Alawii-rĩ,

wagĩrĩirũo kuoya cekeri ithano nĩ ũndũ wa o mũndũ, kũringana na cekeri ĩrĩa ĩtuĩtwo ya harĩa hamũre. Cekeri ĩmwe nĩ gera 20

Wagĩrĩirũo kũneana mbeca icio kũrĩ Haruni na ariũ ake irĩ thogora wa ũkũũri wa acio makĩrĩte.”

Nĩ ũndũ ũcio Musa akĩoya mbeca cia thogora wa ũkũũri kuuma kũrĩ acio maakĩrĩte thogora wa ũkũũri wa Alawii

Agĩkĩoya mbeca icio kuuma kũrĩ marigithathi ma ciana cia Isiraeli, cekeri 1,365, kũringana na cekeri ĩrĩa ĩtuĩtwo ya harĩa hamũre

Musa agĩcoka akĩneana mbeca icio cia thogora wa ũkũũri kũrĩ Haruni na ariũ ake kũringana na uuge wa Yahweh, o ta ũrĩa Yahweh aathĩte Musa.