Ndari 4

Na rĩrĩ, Yahweh akĩarĩria Musa na Haruni, akĩmeera ũũ:

“Tarai ariũ a Kohathu kuuma gatagatĩ-inĩ ka ariũ a Lawii, kũringana na mbarĩ ciao na kũringana na nyũmba cia maithe mao,

arĩa othe marĩ na mĩaka 30 nginya 50 arĩa marĩ gĩkundi-inĩ kĩrĩa kĩgaĩirũo kũruta wĩra thĩinĩ wa hema ya gũtũnganwo.

“Ũyũ nĩguo ũtungata wa ariũ a Kohathu thĩinĩ wa hema ya gũtũnganwo.

Rĩrĩa kambĩ ĩrathaamio, Haruni na ariũ ake marĩingĩraga thĩinĩ magacuurũria gĩtama gĩa gũthiĩka na makahumbĩra ithandũkũ rĩa Ũira nakĩo

Ningĩ makarĩhumbĩra na kĩandarũa kĩa rũũa rwa sili na makaara gĩtambaya kĩa mburuu igũrũ warĩo na makaharũkia mĩtĩ ya kũrĩkuua harĩa yagĩrĩire.

“Ningĩ marĩaraga gĩtambaya kĩa mburuu igũrũ wa metha ya kũigĩrĩrũo mĩgate ya magongona, na igũrũ wayo makaigĩrĩra thani, ikombe, mbakũri, na njagi cia igongona rĩa ndibei; igongona rĩa mũgate rĩrĩa rĩkoragwo ho hingo ciothe rĩagĩrĩire gũikara o hau

Marĩaraga gĩtambaya kĩa rangi mũtune igũrũ wacio na makamĩhumbĩra na kĩandarũa kĩa rũũa rwa sili na makaharũkia mĩtĩ ya kũmĩkuua harĩa yagĩrĩire

Magacoka makoya gĩtambaya kĩa mburuu makahumbĩra mũtĩ wa kũigĩrĩrũo matawa ma kũmũrĩka, hamwe na matawa maguo, magathĩ maguo ma kũnyita ndambĩ, ngĩo ciaguo cia mwaki, na indo ciaguo ciothe cia gwĩkĩrũo maguta iria ihũthagĩrũo harĩ guo

Marĩohaga mũtĩ ũcio na indo ciaguo na kĩandarũa kĩa rũũa rwa sili na makaũigĩrĩra mũgamba-inĩ wa kũũkuua

Ningĩ magĩrĩirũo kwara gĩtambaya kĩa mburuu igũrũ rĩa kĩgongona gĩa thahabu, magakĩhumbĩra na kĩandarũa kĩa rũũa rwa sili, na makaharũkia mĩtĩ ya gũgĩkuua harĩa yagĩrĩire

Marĩcokaga makoya indo ciothe cia ũtungata ũrĩa matungataga hĩndĩ ciothe thĩinĩ wa harĩa hamũre magacigĩrĩra gĩtambaya-inĩ kĩa mburuu na magacihumbĩra na kĩandarũa kĩa rũũa rwa sili magacigĩrĩra mũgamba-inĩ wa gũcikuua.

“Magĩrĩirũo kũruta mũhu kuuma kĩgongona-inĩ na maare gĩtambaya kĩa ndigi cia papũ igũrũ wakĩo

Na igũrũ wakĩo makaigĩrĩra indo ciothe iria ihũthagĩrũo rĩrĩa maratungata kĩgongona-inĩ: ngĩo cia mwaki, hũma, icakũri, na mbakũri, indo ciothe cia kĩgongona; na magĩrĩirũo gũkĩhumbĩra na kĩandarũa kĩa rũũa rwa sili, na maharũkie mĩtĩ ya gũgĩkuua harĩa yagĩrĩire.

“Haruni na ariũ ake magĩrĩirũo gũkorũo marĩkĩtie kũhumbĩra harĩa hamũre na indo ciothe cia harĩa hamũre rĩrĩa kambĩ ĩrathaamio. Nao ariũ a Kohathu magoka gũcikuua, no matiagĩrĩirũo kũhutia harĩa hamũre nĩguo matigakue. Gũkuua indo icio nĩ wĩra wa ariũ a Kohathu ũrĩa ũkonainie na hema ya gũtũnganwo.

“Eliazaru mũrũ wa Haruni mũthĩnjĩri-Yahweh nĩwe ũrĩrũgamagĩrĩra maguta ma gwakia matawa, ũbumba ũrĩa mũnungi wega, igongona rĩa mũtu rĩa kũrutagwo hingo ciothe, na maguta ma gũitanĩrĩrio. Arĩrũgamagĩrĩra gĩikaro kĩrĩa kĩamũre gĩothe na indo ciothe iria irĩ thĩinĩ wakĩo, o hamwe na harĩa hamũre na indo cia ho.”

Ningĩ Yahweh akĩaria na Musa na Haruni akĩmeera ũũ:

“Mũtikanareke mũhĩrĩga wa mbarĩ cia Akohathu ũniinwo gatagatĩ-inĩ ka Alawii

No mekagĩrei ũguo nĩgetha matũũre muoyo matigakue nĩ ũndũ wa gũkuhĩrĩria indo iria nyamũre mũno. Haruni na ariũ ake magĩrĩirũo gũka magaĩre o ũmwe wao wĩra wa ũtungata wake na kĩrĩa arĩkuuaga

Matiagĩrĩirũo kũingĩra thĩinĩ mone indo iria nyamũre o na hanini, nĩguo matigakue.”

Yahweh agĩcoka akĩarĩria Musa, akĩmwĩra ũũ:

“Tara ariũ a Gerishoni kũringana na nyũmba cia maithe mao na kũringana na nyũmba ciao

Wagĩrĩirũo kwandĩkithia arĩa othe marĩ na mĩaka 30 nginya 50, arĩa marĩ gĩkundi-inĩ kĩrĩa kĩgaĩirũo kũruta wĩra thĩinĩ wa hema ya gũtũnganwo

Ici nĩcio indo iria nyũmba cia Agerishoni igaĩirũo kũrũmbũiya na gũkuua:

Marĩkuuaga itambaya cia hema ya gĩikaro kĩrĩa kĩamũre, hema ya gũtũnganwo, kĩandarũa gĩa gũkĩhumbĩra na kĩandarũa kĩa rũũa rwa sili kĩrĩa gĩkoragwo igũrũ wakĩo, mbathia ya mũromo wa hema ya gũtũnganwo,

itama iria icunjurĩte cia nja, mbathia ya mũromo wa nja ĩrĩa ĩthiũrũrũkĩirie gĩikaro kĩu kĩamũre na kĩgongona, tũmĩkanda twa hema, na indo ciacio ciothe na kĩndũ gĩothe kĩhũthagĩrũo ũtungata-inĩ wa gĩikaro kĩu kĩamũre. Ũcio nĩguo wĩra wao

Ũtungata wothe na mĩrigo ya Agerishoni wagĩrĩire kũrũgamagĩrĩrũo nĩ Haruni na ariũ ake; mwagĩrĩirũo kũmehokera mĩrigo ĩyo yothe ĩrĩ ũtungata wao

Ũcio nĩguo ũrĩkoragwo ũrĩ ũtungata wa nyũmba cia Agerishoni hema-inĩ ya gũtũnganwo, na marĩrutaga wĩra rungu rwa ũtongoria wa Ithamaru mũrũ wa Haruni mũthĩnjĩri-Yahweh.

“Nao ariũ a Merari ũmandĩkithie kũringana na nyũmba ciao na kũringana na nyũmba ya maithe mao

Wagĩrĩirũo kwandĩkithia arĩa marĩ na mĩaka 30 nginya 50, arĩa othe marĩ gĩkundi-inĩ kĩrĩa kĩgaĩirũo kũruta wĩra thĩinĩ wa hema ya gũtũnganwo

Ici nĩcio indo iria mehokeirũo gũkuuaga ikonainie na ũtungata wao hema-inĩ ya gũtũnganwo: buremu cia gĩikaro kĩu kĩamũre, mĩgamba yakĩo, itugĩ ciakĩo, makinya makĩo;

itugĩ cia nja ĩrĩa ĩthiũrũrũkĩirie, makinya ma cio, mĩcumarĩ yacio ya hema, na tũmĩkanda twacio twa hema hamwe na indo ciothe na ũtungata wothe ũrĩa ũkonainie nacio. Wagĩrĩirũo kũmagaĩra na marĩĩtwa indo iria magĩrĩirũo gũkuuaga

Ũguo nĩguo nyũmba cia ariũ a Merari irĩtungataga hema-inĩ ya gũtũnganwo, rungu rwa ũtongoria wa Ithamaru mũrũ wa Haruni mũthĩnjĩri-Yahweh.”

Musa na Haruni na atongoria a kĩrĩndĩ magĩkĩandĩkithia ariũ a Kohathu kũringana na nyũmba ciao na kũringana na nyũmba ya maithe mao,

arĩa othe maarĩ na mĩaka 30 nginya 50, arĩa maarĩ gĩkundi-inĩ kĩrĩa kĩagaĩirũo kũruta wĩra thĩinĩ wa hema ya gũtũnganwo

Mũigana wothe wa arĩa maandĩkithirio kũringana na mbarĩ ciao warĩ 2,750.

Acio othe maandĩkithirio gatagatĩ-inĩ ka mbarĩ cia Akohathu, arĩa othe maatungataga thĩinĩ wa hema ya gũtũnganwo. Musa na Haruni magĩkĩmandĩkithia o ta ũrĩa Yahweh aathanĩte kũgerera Musa.

Ariũ a Gerishoni magĩkĩandĩkithio kũringana na nyũmba ciao na kũringana na nyũmba ya maithe mao,

arĩa othe maarĩ na mĩaka 30 nginya 50, arĩa maarĩ gĩkundi-inĩ kĩrĩa kĩagaĩirũo kũruta wĩra thĩinĩ wa hema ya gũtũnganwo

Mũigana wothe wa arĩa maandĩkithirio kũringana na mbarĩ ciao warĩ 2,630.

Acio nĩo maandĩkithirio kuuma harĩ mbarĩ cia ariũ a Gerishoni, arĩa othe maatungataga hema-inĩ ya gũtũnganwo. Musa na Haruni magĩkĩmandĩkithia o ta ũrĩa Yahweh aathanĩte.

Ariũ a Merari magĩkĩandĩkithio kũringana na nyũmba ciao na kũringana na nyũmba ya maithe mao,

arĩa othe maarĩ na mĩaka 30 nginya 50, arĩa maarĩ gĩkundi-inĩ kĩrĩa kĩagaĩirũo kũruta wĩra thĩinĩ wa hema ya gũtũnganwo

Mũigana wothe wa arĩa maandĩkithirio kũringana na mbarĩ ciao warĩ 3,200.

Acio nĩo maandĩkithirio kuuma harĩ mbarĩ cia ariũ a Merari, arĩa Musa na Haruni maandĩkithirie o ta ũrĩa Yahweh aathanĩte kũgerera Musa.

Musa na Haruni na atongoria a Isiraeli magĩkĩandĩkithia Alawii acio othe kũringana na mbarĩ ciao na kũringana na nyũmba cia maithe mao;

maarĩ na mĩaka 30 nginya 50, na othe maagaĩirũo wĩra wa gũtungata na gũkuuaga mĩrigo ĩrĩa yakonainie na hema ya gũtũnganwo

Mũigana wothe wa arĩa maandĩkithirio warĩ 8,580.

Magĩkĩandĩkithio o ta ũrĩa Yahweh aathanĩte kũgerera Musa, o mũndũ kũringana na ũtungata ũrĩa aagaĩirũo na mũrigo wake; maandĩkithirio o ta ũrĩa Yahweh aathĩte Musa.