Rwĩmbo rwa Solomoni 2

“Niĩ ndĩ ihũa rĩa Sharon, Ndĩ ihũa rĩa itoka rĩa mĩkuru-inĩ.”

“O ta ihũa rĩa itoka gatagatĩ-inĩ ka mĩigua No taguo mwendwa wakwa atariĩ gatagatĩ-inĩ ka airĩtu.”

“O ta mũtĩ wa ĩpũ gatagatĩ-inĩ ka mĩtĩ ya mũtitũ, No taguo mwendwa wakwa atariĩ gatagatĩ-inĩ ka anake. Nĩ ndĩrerirĩria mũno gũikara thĩ kĩĩruru-inĩ gĩake, Na itunda rĩake nĩ rĩrĩ mũrĩo ngĩrĩcama.

Nĩ aandonyirie nyũmba ya iruga, Na bendera yake igũrũ rĩakwa yarĩ wendo.

Njanjamũrai na keki cia thabibũ nyũmithie; Mũũhe matunda ma ĩpũ nĩguo ngĩe na hinya, Tondũ ndĩ mũcuce nĩ wendo.

Guoko gwake kwa ũmotho kũrĩ rungu rwa mũtwe wakwa, Nakuo guoko gwake kwa ũrĩo gũkahĩmbĩria.

Inyuĩ airĩtu a Yahrushalayim, nĩ ndamwĩhĩtithia Na thiya na thwariga cia mũgoma cia gĩthaka: Mũtikagerie gũũkĩria kana kwarahũra wendo thĩinĩ wakwa nginya ũrĩĩyarahũra guo mwene.

Nĩ ndĩraigua mũgambo wa mwendwa wakwa! Atĩrĩrĩ, nĩwe ũyũ ũroka, ararũũga irĩma, agatũrũhĩra tũrĩma-inĩ.

Mwendwa wakwa atariĩ ta thiya, atariĩ ta gathwariga. Nĩwe ũũrĩa, arũgamĩte thutha wa rũthingo rwitũ, Akĩĩrorera ndirica-inĩ, Agĩcũthĩrĩria mĩanya-inĩ ya ndirica.

Mwendwa wakwa nĩ arĩtie, akanjĩra atĩrĩ: ‘Ũkĩra, mwendwa wakwa, Wee mwendwa wĩ thaka yakwa, ũkĩraa tũthiĩ nawe.

Tarora wone! Hĩndĩ ya heho nĩ thiru. Mbura nĩ ĩkĩĩte na ĩgathira.

Mahũa nĩ macanũkĩte bũrũri-inĩ, Ihinda rĩa gũceha nĩ ikinyu, Na rwĩmbo rwa ndirahũgĩ nĩ rũraiguĩka bũrũri-inĩ witũ.

Mũkũyũ nĩ wĩruhĩtie ngũyũ iria ciambaga kwĩruha; Mĩthabibũ nĩ ĩrutĩte kĩro na ĩkaruta mũtararĩko wayo. Ũkĩra, mwendwa wakwa, na ũũke. Wee thaka yakwa, ũka tũthiĩ nawe.

Wee gatutura gakwa ũrĩ kũu mĩĩgitio-inĩ ya ndũmba ya ihiga, Kũu mĩĩgitio-inĩ ya kĩharũrũka, Reke nguone na njigue mũgambo waku, Tondũ mũgambo waku nĩ mwega na wee wĩ mũthaka.’”

“Tũnyitĩrei mbwe, Tũbwe tũrĩa tũthũkangagia mĩgũnda ya mĩthabibũ, Tondũ mĩgũnda itũ ya mĩthabibũ nĩ ĩrutĩte kĩro.”

“Mwendwa wakwa nĩ wakwa na niĩ ndĩ wake. Nĩ kũrĩithia ararĩithia kũu mahũa-inĩ ma itoka.

Nginya rĩrĩa mũthenya ũrĩĩrura na ciĩruru ibuĩrie, Hũndũka na ihenya, wee mwendwa wakwa, O ta thiya kana thwariga nyanake irĩma-inĩ cia Betheri.