Rwĩmbo rwa Solomoni 3

“Ũtukũ ndĩ ũrĩrĩ-inĩ wakwa, Nĩ ndacaragia ũcio ngoro yakwa ĩnyotagĩra nyendete, Ndamũcaririe, no ndiamuonire.

Nĩ ngũũkĩra thiĩ ngorũre itũũra-inĩ; Barabara-inĩ na ihaaro-inĩ cia mũingĩ, Reke ngacarie ũcio ngoro yakwa yendete. Ndamũcaririe, no ndiamuonire.

Arangĩri arĩa maathiũrũrũkaga itũũra-inĩ nĩ maanyonire. Ngĩmoria atĩrĩ, ‘Nĩ munyoneire ũcio ngoro yakwa ĩnyoteire nyendete?’

Rĩrĩa ndamahĩtũkire o ũguo, Ngĩona ũcio ngoro yakwa yanyoteire nĩ rwendo. Ngĩmũnyita, na ndiamũrekirie O nginya ngĩmũtonyia nyũmba ya maitũ, Rumu-inĩ ya thĩinĩ ya ũcio woohire nda ya kũnjiara.

Inyuĩ airĩtu a Yahrushalayim, nĩ ndamwĩhĩtithia Na thiya na thwariga cia mũgoma cia gĩthaka: Mũtikagerie gũũkĩria kana kwarahũra wendo thĩinĩ wakwa nginya ũrĩĩyarahũra guo mwene.”

“Nũũ ũyũ ũroka kuuma werũ-inĩ atariĩ ta itugĩ cia ndogo, Arĩ na mũtararĩko wa manemane na ũbani, Na mĩtutu yothe ĩrĩa ĩnungaga wega ya mũhũũri biacara?”

“Haiyaĩĩĩ! Nĩ gĩtanda gĩa Solomoni. Gĩthiũrũrũkĩirio nĩ arũme mĩrongo ĩtandatũ makaraũ, Kuuma harĩ arũme arĩa marĩ hinya a Isiraeli,

Othe marĩ na rũhiũ rwa njora, Othe nĩ njorua cia mbaara, O ũmwe wao arĩ na rũhiũ rwake rwa njora mwena-inĩ Nĩguo mamũgitĩre kuuma harĩ imakania cia ũtukũ.”

“ Mũthamaki Solomoni nĩethondekeire ngarĩ ya mbarathi ya ita akĩhũthĩra mĩtĩ ya Lebanoni.

Aathondekire itugĩ ciayo na betha, Mĩĩtiiro yayo akĩmĩthondeka na thahabu. Handũ ha gũikarĩra hathondeketwo na ndigi cia rangi wa papũ; Thĩinĩ kĩagemirio na njĩra ya wendo wa aarĩ a Yahrushalayim.”

“Umai, inyuĩ airĩtu a Zayuni, Mwĩrorerei Mũthamaki Solomoni Ehumbĩte thũmbĩ ya ũhiki ĩrĩa aathondekeirũo nĩ nyina Mũthenya ũrĩa aahikanirie, Mũthenya ũrĩa ngoro yake yarĩ na gĩkeno.”