Rwĩmbo rwa Solomoni 4

“Mũtiũke mwĩyonere! Kaĩ wĩ mũthaka-ĩĩ mwendwa wakwa! Maitho maku matariĩ ta ma ndutura mahumbĩrĩtwo nĩ njuĩrĩ ciaku njogothe. Njuĩrĩ yaku ĩtariĩ ta rũũru rwa mbũri Rũgĩikũrũka rumĩte irĩma-inĩ cia Gileadi.

Magego maku matariĩ ta rũũru rwa ng’ondu o rĩrĩ ciarĩkia kwenjwo Iria ciakorũo ciarĩkia gũthambio, Ciothe irĩ na mahatha, Na gũtirĩ o na ĩmwe ĩkoretwo ĩthatĩte.

Mĩromo yaku ĩtariĩ ta kauthi gatune, Na ciugo ciaku nĩ njagĩrĩru mũno. O ta gĩcunjĩ gĩa itunda rĩa ikomamanga No taguo makai maku mahaana, mahumbĩrĩtwo nĩ ikundo cia njuĩrĩ yaku njogothe.

Ngingo yaku ĩtariĩ ta nyũmba ndaya na igũrũ ya Daudi, Ĩrĩa ya kũigwo matharaita. O ĩyo ĩcuuragio ngo ngiri ĩmwe, Ngo ciothe cia arũme arĩa njamba.

Nyondo ciaku cierĩ itariĩ ta tũũri twĩrĩ twa thiya, Tũmahatha twa thiya, rĩrĩa tũramuramura mahũa-inĩ ma itoka.”

“Mũthenya ũtanarura na ciĩruru itanabuĩria, Nĩ ngwĩkinyia kĩrĩma-inĩ kĩa manemane Na thiĩ karĩma-inĩ ka ũbani.”

“Wĩ mũthaka biũ ũkanyoroka, wee mwendwa wakwa, Ndũrĩ na kameni o na kanini.

Ũka tũthiĩ nawe tuume Lebanoni, wee mũhiki wakwa, Ũka tũthiĩ nawe tuume Lebanoni. Ikũrũka kuuma gacũmbĩrĩ ka Amana, Kuuma gacũmbĩrĩ ga Seniri, gacũmbĩrĩ ka Herimoni, Kuuma imamo-inĩ cia mĩrũthi, kuuma irĩma-inĩ cia ngarĩ.

Nĩ ũtahĩte ngoro yakwa ũkamĩthuthanga, we kairĩtu ka maitũ, o wee mũhiki wakwa, Nĩ ũnyunĩire ritho rimwe tu ũgacucanga ngoro yakwa ĩgathira biũ, Nginya na karengereri kamwe tu ka ngingo yaku, nĩ ũmĩcucĩĩte biũ.

We kairĩtu ka maitũ, o wee mũhiki wakwa, wendani waku kaĩ nĩ mwega-ĩ! Wendani waku nĩ ũkĩrĩte ndibei, Na mũtararĩko wa maguta maku nĩ mwega gũkĩra mahuti o mothe marĩa manungi wega!

Iromo ciaku, wee mũhiki wakwa, nĩ ta magua magĩtatia ũũkĩ. Ũũkĩ na iria ikoragwo nguruĩ-inĩ ya rũrĩmĩ rwaku, Na mũtararĩko wa nguo ciaku no ta mũtararĩko wa Lebanoni.

Mwarĩ wa maitũ, o ũcio mũhiki wakwa, atariĩ ta mũgũnda mũirigĩre, Gĩthima kĩirigĩre, o ta itherũkĩro rĩa maĩ ihingĩrĩrie.

Thuuna ciaku nĩ mũgũnda mũthaka wa makomamanga O ũcio ũrĩ na matunda marĩa mega mũno, na mũhanuni hamwe na mĩmera ya nado,

Mũmera wa nado na mahũa ma nyeki-inĩ, karamathi na mũndarathini, Na mĩthemba yothe ya mĩtĩ ya ũbani, manemane, na thubiri, Hamwe na mahuti mothe manungi wega marĩa mega mũno.

Wee wĩ itherũkĩro rĩa maĩ rĩa mũgũnda, gĩthima kĩa maĩ matheru, Na tũrũũĩ tũratherera kuuma Lebanoni.

Arahũka, wee rũhuho rwa mwena wa rũgongo; Ingĩra, wee rũhuho rwa mwena wa mũhuro. Hurutanĩrai kũu mũgũnda-inĩ wakwa. Reke mũtararĩko waguo ũhunje.” “Reke mwendwa wakwa oke mũgũnda-inĩ wake Arĩe matunda maguo marĩa mega mũno.”