Rwĩmbo rwa Solomoni 5

“Nĩ ndaingĩra mũgũnda wakwa, Mwarĩ wa maitũ, o wee mũhiki wakwa. Nĩ njoete manemane makwa na mahuti makwa marĩa manungaga wega. Nĩ ndĩte magua makwa o na ũũkĩ wakwa; Nĩ nyuĩte ndibei yakwa o na iria rĩakwa.” “Rĩai, inyuĩ arata akwa arĩa nyendete! Nyuai na mũrĩĩo nĩ wendo!”

“Ndĩ toro, no ngoro yakwa ndĩkomete. Nĩ ndĩraigua mũgambo wa mwendwa wakwa akĩringaringa mũrango! ‘Hingũrĩra, wee mwarĩ wa maitũ, mwendwa wakwa, gatutura gakwa, o wee wakwa ũtathahĩtio! Nĩ gũkorũo mũtwe wakwa nĩ ũihũgĩtio nĩ ime, Nacio ikundo cia njuĩrĩ ciakwa ikaihũgio nĩ ireera rĩa ũtukũ.’

Nĩ ndutĩte kanjũ yakwa. Hihi no mũhaka ndĩmĩĩhumbe rĩngĩ? Nĩ ndĩĩthambĩte magũrũ. Ngũkĩmahaka gĩko rĩngĩ atĩa?

Mwendwa wakwa aingĩririe guoko gwake kamwanya-inĩ ka mũrango, Nayo ngoro yakwa ĩroka o ĩgĩkundũka nĩ ũndũ wake.

Na niĩ ndĩrokĩra kũhingũrĩra mwendwa wakwa; Moko makwa marataatagia manemane, Nacio ciara ciakwa igataatia maguta ma manemane Nyitĩro-inĩ cia konji.

Ndĩrahingũrĩra mwendwa wakwa, No mwendwa wakwa nĩ areherete, nĩ arathiĩte. Nĩ ndĩrorirũo nĩ hinya hĩndĩ ĩyo araririe. Ndĩramũcaria, no ndinamuona. Ndĩramwĩta, no ndananjĩtĩka.

Arangĩri arĩa marathiũrũrũkaga itũũra maranyona. Marahũũra, na marandihia. Arangĩri a thingo marandunya neti yakwa ya kwĩhumbĩra mũtwe .

Inyuĩ aarĩ aya a Yahrushalayim, nĩ ndamwĩhĩtithia: Mũngĩona mwendwa wakwa, Mwĩrei atĩ ndĩ mũcuce nĩ wendo.”

“Mwendwa waku-rĩ, akĩrĩte mwendwa ũngĩ o wothe atĩa, Wee thaka ĩno harĩ andũ-a-nja othe? Mwendwa waku-rĩ, akĩrĩte mwendwa ũngĩ o wothe atĩa, Atĩ nĩkĩo ũratwĩhĩtithia mwĩhĩtwa ta ũcio?”

“Mwendwa wakwa nĩ mwerũ na agatunĩha; Akoragwo ekũũranĩte harĩ arũme ngiri ikũmi.

Mũtwe wake nĩ thahabu, thahabu ĩrĩa njega mũno. Mĩkũmba ya njuĩrĩ ciake ĩtariĩ ta mathangũ manyitanu , Nĩ njirũ o ta ihuru.

Maitho make matariĩ ta ma ndutura irĩ tũrũũĩ-inĩ twa maĩ, Ta mathambĩtio na mwĩtha, Magagĩkorwo mahandĩtwo na mũhandĩre ũrĩa mwagĩrĩru wega.

Makai make matariĩ ta kamũgũnda ka mahuti manungi wega, Hĩba cia mahuti marĩ na mũtararĩko mwega. Iromo ciake nĩ mahũa ma itoka, itaatagia maguta ma manemane.

Ciara ciake cia moko nĩ ta ngome cia thahabu, igemetio na tũhiga tũrĩa twĩtagwo thumarati. Nda yake ĩhana mũguongo mũnyorokie ũhumbĩrĩtwo na safia.

Mĩthimo yake nĩ itugĩ cia mahiga ma goro ciĩkĩrĩtwo makinya-inĩ ma thahabu ĩrĩa njega mũno. Maũthĩ make atariĩ ta irĩma cia Lebanoni, arũngarĩte o ta mĩtarakwa yakuo.

Kanua gake karĩ mũrĩo mũno! Wee! Maũndũ mothe mamwĩgiĩ nĩ ma kwĩrirĩrio. Inyuĩ aarĩ aya a Yahrushalayim, ũcio nĩwe mwendwa wakwa, ũcio nĩwe nyendete.”