Rwĩmbo rwa Solomoni 6

“Mwendwa waku athiire kũ, Wee mũthaka mũno harĩ andũ-a-nja? Mwendwa waku ahũndũkire athiĩ na kũ? Nĩ tũmũcarie tũrĩ hamwe nawe.”

“Mwendwa wakwa athiire mũgũnda-inĩ wake, Tũmĩgũnda-inĩ twa mahuti marĩa manungaga wega, Athiire kũrĩĩra kũu mĩgũnda-inĩ Na gũtua mahũa ma itoka.

Niĩ ndĩ wa mwendwa wakwa, Nake mwendwa wakwa nĩ wakwa. Nĩ kũrĩĩra arĩyagĩra kũu mahũa-inĩ ma itoka.”

“Wee mwendwa wakwa, ũthakarĩte-ĩĩ! O ta Tiriza, Wagĩrĩte o ta Yahrushalayim, Na ũrĩ wa kũgegania o ta mbũtũ cia ita ithiũrũrũkĩirie bendera ciacio.

Hũgũra maitho maku ũtige kũndora, Tondũ maitho maku nĩ mandooragia. Njuĩrĩ yaku ĩtariĩ ta rũũru rwa mbũri Rũgĩikũrũka ruumĩte irĩma-inĩ cia Gileadi.

Magego maku matariĩ ta rũũru rwa ng’ondu Iria ciakorũo ciarĩkia gũthambio, Ciothe irĩ na mahatha, Na gũtirĩ o na ĩmwe ĩthatĩte.

O ta gĩcunjĩ gĩa itunda rĩa ikomamanga No taguo makai maku mahaana, mahumbĩrĩtwo nĩ ikundo njogothe cia njuĩrĩ yaku.

No gũkorũo na aka 60 a mũthamaki Na thuriya 80 O na airĩtu aingĩ thingi matangĩtarĩka.

Ĩndĩ ũmwe nowe gatutura gakwa, o ũcio wakwa ũtarĩ kameni. Nowe mũirĩtu wa nyina. Nĩwe gĩtũnio kĩa ũcio wamũciarire. Aarĩ mamuonire, makĩmũrathima; Aka a mũthamaki na thuriya mamuonaga, makamũgaathĩrĩria.

‘Nũũ ũcio ũkengaga ta ũtheri wa rũcinĩ gũgĩkĩa, Agathakara ta mweri ũrĩ mũgima, Agakenga ta ũtheri wa riũa, Na agakorũo arĩ wa kũgegania ta mbũtũ cia ita ithiũrũrũkĩirie bendera ciacio?’”

“Nĩ ndaikũrũkire mũgũnda-inĩ wa njũgũ karanga Nĩgetha ngone mĩmera ĩrĩa yamerete mũkuru-inĩ, Ngarore kana mũthabibũ nĩ wathundũrĩte, Kana mĩtĩ ya mĩkomamanga nĩ yarutĩte kĩro.

O na itanamenya, Merirĩria makwa nĩ maandwarĩte o ta Ngaari cia mbarathi cia Aminadibu.”

“Coka, coka, wee Mũshulami! Coka, coka, Nĩgetha tũkwĩrorere!” “Nĩ kĩĩ gĩtũmaga mwĩrorere Mũshulami?” “Atariĩ ta ikundi igĩrĩ cia mbũtũ!”