Rwĩmbo rwa Solomoni 7

“Kaĩ magũrũ maku nĩ mathaka marĩ iratũ-inĩ ciaku-ĩ, Wee mũirĩtu ũyũ mũtĩĩku wa mũrũ wa mũthamaki! Ngathĩkanĩrio cia ciero ciaku itariĩ ta mathaga, nĩ ta wĩra wa mũturi njorua.

Mũkonyo waku nĩ ta kabakũri ga gĩthiũrũrĩ na gatingĩtingiara ndibei ningĩrĩrie. Nda yaku nĩ ta hĩba ya ngano, Ĩthiũrũrũkĩirio nĩ mahũa ma itoka.

Nyondo ciaku cierĩ itariĩ ta tũũri twĩrĩ twa thiya, Tũmahatha twa thiya.

Ngingo yaku ĩtariĩ ta nyũmba ndaya na igũrũ yakĩtwo na mĩguongo. Maitho maku mahaana ta tũria twa kũrĩithĩria thamaki twa Heshiboni, Hakuhĩ na kĩhingo kĩa Bathi-rabimu. Iniũrũ rĩaku rĩtariĩ ta nyũmba ndaya na igũrũ ya Lebanoni, Ĩrĩa ĩng'etheire Dameski.

Mũtwe waku ũhaana ta Karimeli, o ũguo ũgũikarĩire. Na njuĩrĩ ciaku itariĩ ta ndigi cia rangi wa papũ. Mũthamaki nĩ akenagio mũno nĩ njuĩrĩ yaku thaka na ndaihu.

Kaĩ ũrĩ mũthaka-ĩ, ningĩ ũrĩ mwega Gũkĩra maũndũ mothe marĩa marehaga gĩkeno, wee rwendo rũrũ!

Kĩrũgamo gĩaku nĩ ta mũtĩ wa mũkĩndũ, Nacio nyondo ciaku itariĩ ta imanjĩka cia thabibũ.

Ndoigire atĩrĩ, ‘Nĩ ngũhamba mũtĩ wa mũkĩndũ Nĩguo ndue mĩahũ yaguo ya matunda.’ Nyondo ciaku irohaana ta imanjĩka cia thabibũ, Mĩheehũ yaku ĩkorũo na mũtararĩko o ta matunda ma ĩpũ,

Nayo karakara yaku ĩhaane ta ndibei ĩrĩa njega biũ ya mwendwa wakwa.” “Ĩmerũke wega, Ĩnyũrũrũkĩre iromo cia arĩa makomete mambie kwaria.

Niĩ ndĩ wa mwendwa wakwa, Nake nĩ niĩ ahĩahĩagĩra.

Ũka, wee mwendwa wakwa, Nĩ tũthiĩ gĩthaka-inĩ; Nĩ tũthiĩ tũkararĩrĩre icagi-inĩ.

Nĩ tũũkĩre rũcinĩ tene tũthiĩ mĩgũnda-inĩ ya mĩthabibũ Tũkarore kana mũthabibũ nĩ ũthundũrĩte, Tũrore kana nĩ ũrutĩte mahũa, Kana mĩkomamanga ĩrĩ na thuuna. Kũu nĩkuo ngũkuoneria wendo wakwa.

Mandarĩki nĩ marutaga mũtararĩko wamo; Mĩrango-inĩ itũ kũrĩ mĩthemba yothe ya matunda marĩa mega. Marĩa ma mũtuano o na marĩa ma tene Nĩ ngũigĩire, wee mwendwa wakwa.