Samueli wa Mbere 5

Rĩrĩa Afilisti maatahire Ithandũkũ rĩa Kĩhoti ũrĩa wa ma, maarĩrutire Ebenezeri makĩrĩtwara Ashidodi

Afilisti acio mooire Ithandũkũ rĩu rĩa Kĩhoti ũrĩa wa ma makĩrĩtwara nyũmba-inĩ ya Dagoni na makĩrĩiga hakuhĩ na Dagoni

Na rĩrĩa Aashidodi mookĩrire tene mũthenya ũyũ ũngĩ, magĩkora Dagoni ĩgwĩte ũthiũ ũgaturuma thĩ mbere ya Ithandũkũ rĩa Yahweh. Kwoguo makĩoya Dagoni na makĩmĩcokia hau yaigagwo

Rĩrĩa mookĩrire rũcinĩ tene mũthenya ũrĩa warũmĩrĩire, magĩkora Dagoni ĩgwĩte ũthiũ ũgaturuma thĩ mbere ya Ithandũkũ rĩa Yahweh. Mũtwe wa Dagoni na moko mayo meerĩ cioinĩkĩte ikagwa hau mũromo-inĩ. Gĩcunjĩ kĩrĩa gĩatariĩ ta thamaki nokĩo tu gĩatigarĩte gĩtarĩ kiunĩku

Nĩkĩo nginya ũmũthĩ athĩnjĩri-kĩhoti a Dagoni na andũ arĩa othe maingĩraga nyũmba-inĩ ya Dagoni matageragĩra mũromo-inĩ wa Dagoni kũu Ashidodi.

Guoko kwa Yahweh gũkĩgũmĩra Aashidodi, na akĩmaananga na njĩra ya kũhũũra Ashidodi na icigo ciakuo na mũrimũ wa kũimba ngaaĩ

Na rĩrĩa andũ a Ashidodi moonire ũrĩa gwekĩkaga, makiuga ũũ: “Mũtikareke Ithandũkũ rĩa Kĩhoti wa Isiraeli rĩthiĩ na mbere gũikara hamwe na ithuĩ, nĩ gũkorũo guoko gwake nĩ gũtũgũmĩire hamwe na kĩhoti witũ Dagoni.”

Nĩ ũndũ ũcio magĩtũmanĩra athani othe a Afilisti na makĩmacokanĩrĩria hamwe makĩmoria ũũ: “Tũgwĩka atĩa na Ithandũkũ rĩa Kĩhoti wa Isiraeli?” Makĩmacokeria atĩrĩ: “Ithandũkũ rĩu rĩa Kĩhoti wa Isiraeli nĩ rĩtwarũo Gathu.” Nĩ ũndũ ũcio magĩtwara Ithandũkũ rĩa Kĩhoti wa Isiraeli kũu.

Rĩrĩa maarĩtwarire kũu, guoko kwa Yahweh gũkĩgũmĩra itũũra rĩu, ũndũ ũrĩa watũmire kũgĩe guoya mũnene. Akĩhũũra andũ a itũũra rĩu, kuuma ũrĩa mũnini o nginya ũrĩa mũnene, na makĩgĩa mũrimũ wa kũimba ngaaĩ

Nĩ ũndũ ũcio magĩtwara Ithandũkũ rĩa Kĩhoti ũrĩa wa ma Ekironi, no rĩrĩa Ithandũkũ rĩu rĩa Kĩhoti ũrĩa wa ma rĩakinyire Ekironi, Aekironi makĩambĩrĩria kũrĩra manĩrĩire makiugaga ũũ: “Matũrehera Ithandũkũ rĩa Kĩhoti wa Isiraeli nĩgetha ithuĩ hamwe na andũ aitũ tũũragwo!”

Magĩcoka magĩtũmanĩra athani othe a Afilisti na makĩmacokanĩrĩria hamwe makĩmeera ũũ: “Eheriai Ithandũkũ rĩa Kĩhoti wa Isiraeli; rekei rĩcoke kũrĩa rĩikaraga nĩgetha ithuĩ o hamwe na andũ aitũ tũtikooragwo.” Nĩ gũkorũo guoya wa gĩkuũ watheremete itũũra-inĩ rĩu rĩothe; nakuo guoko gwa Kĩhoti ũrĩa wa ma nĩ kwamagũmĩire mũno,

na andũ arĩa mataakuire, maahũũrirũo na mũrimũ wa kũimba ngaaĩ . Nakĩo kĩrĩro gĩa kũhoya ũteithio gĩa itũũra rĩu gĩgĩkinya o igũrũ.