Thaburi 148

HalleluYah! Goocai Yahweh inyuĩ mũrĩ igũrũ; Mũkumiei inyuĩ mũrĩ kũndũ gũtũũgĩru.

Mũkumiei, inyuĩ araika ake othe. Mũkumiei, inyuĩ mbũtũ yake yothe.

Mũkumiei, inyuĩ riũa na mweri. Mũkumiei, inyuĩ njata ciothe iria icangararaga.

Mũkumie, wee igũrũ rĩrĩa rĩrĩ igũrũ mũno O na inyuĩ maĩ marĩa marĩ igũrũ rĩa igũrũ mũkumiei.

Nĩ ikumie rĩĩtwa rĩa Yahweh, Nĩ gũkorũo aathanire, nacio ikĩũmbwo.

Agĩgĩtũma itũũre ciĩhandĩte tene na tene; Nĩ gũtua atuire watho nacio itingĩũkĩrũka.

Goocai Yahweh, inyuĩ mũikaraga thĩinĩ wa thĩ, Inyuĩ ciũmbe iria nene cia iria-inĩ o na maĩ mothe marĩ kũrĩa kũriku,

Inyuĩ mwaki na mbura ya mbembe, mbarabu na matu, Wee kĩhuhũkanio kĩnene kĩrĩa kĩhingagia kiugo gĩake,

Inyuĩ ithuri o na inyuĩ tũrĩma tuothe, Inyuĩ mĩtĩ ya matunda o na mĩtarakwa yothe,

Inyuĩ nyamũ cia gĩthaka o na mahiũ, Inyuĩ tũnyamũ tũrĩa tũtambi thĩ o na nyoni iria ciũmbũkaga na mathagu,

Inyuĩ athamaki a thĩ na inyuĩ ndũrĩrĩ ciothe, Inyuĩ anene na inyuĩ atuanĩri ciira othe a gũkũ thĩ,

Inyuĩ anake na airĩtu, Athuri arĩa akũrũ o hamwe na tũmwana.

Nĩ makĩrekwo makumie rĩĩtwa rĩa Yahweh, Tondũ rĩĩtwa rĩake riki norĩo itũũgĩru. Ũkaru wa ũnene wake nĩ mũtũũgĩru gũkĩra thĩ na igũrũ.

Ningĩ nĩambararĩtie rũhĩa rwa andũ ake, Nĩguo akumagio nĩ andũ ake othe arĩa maiguaine nake, Nĩo ciana cia Isiraeli, andũ arĩa makoragwo hakuhĩ nake. HalleluYah!