Thaburi 68
Kĩhoti nĩ arahũke, thũ ciake irohurunjũka, Na arĩa mamũthũire more mehere mbere yake.
Ũromatwara kũraihu, o ta ũrĩa ndogo ĩtwaragwo kũraihu nĩ rũhuho; O ta ũrĩa mũhũra ũringũkaga ũrĩ mwaki-inĩ-rĩ, Andũ arĩa aganu nĩ mathire mehere mbere ya Kĩhoti.
No andũ arĩa athingu nĩ makene; Nĩ makene mũno marĩ mbere ya Kĩhoti; Nĩ macanjamũke na makene.
Inĩrai Kĩhoti; inai nyĩmbo mũgooce rĩĩtwa rĩake. Inĩrai Ũrĩa ũratuĩkanĩria werũ-inĩ mwaraganu. Yahu nĩrĩo rĩĩtwa rĩake! Kenai mũrĩ mbere yake!
Ithe wa arĩa matarĩ maithe, o we ũgitagĩra atumia a ndigwa Nĩ Kĩhoti, o ũcio ũrĩ gĩikaro-inĩ gĩake kĩamũre.
Kĩhoti nĩ aheaga arĩa maikaraga oiki mũciĩ wa gũikara; Nĩ ohoraga arĩa mohetwo agatũma magaacĩre. No arĩa aremi megũtũũra bũrũri-inĩ mũng’aru.
ĩĩni Kĩhoti, hĩndĩ ĩrĩa watongoririe andũ aku, Rĩrĩa watuĩkanĩirie werũ-inĩ, (Sela)
Thĩ nĩ yathingithire; Igũrũ rĩkiuria mbura nĩ ũndũ wa Kĩhoti; Kĩrĩma gĩa Sinai gĩgĩthingitha nĩ ũndũ wa Kĩhoti, o we Kĩhoti wa Isiraeli.
Nĩ watũmire kuure mbura nene, wee Kĩhoti; Andũ aku arĩa moorĩtwo nĩ hinya, nĩ wamekĩrire hinya.
Magĩikara thĩinĩ wa hema ciaku; Arĩa athĩni nĩ wamaheaga mabataro mao nĩ ũndũ wa wega waku, wee Kĩhoti.
Yahweh nĩaatumũrire ũhoro; Andũ-a-nja arĩa mamenyithanirie ngumo ĩyo maarĩ mbũtũ nene.
Athamaki a mbũtũ nĩ morĩte, magathiĩ! Mũndũ-wa-nja ũrĩa ũtigagwo mũciĩ nĩ agayagĩrũo indo iria itahĩtwo.
O na gũtuĩka inyuĩ arũme aya mũkomaga harĩa mĩaki yakĩtio-rĩ, Nĩ gũgũkorũo na mathagu ma ndutura mahumbĩrĩtwo na betha, Na njoya cia thahabu ĩrĩa njega.
Rĩrĩa El Shaddai aahurunjire athamaki a kuo-rĩ, Mbarabu nĩ yagũire igũrũ rĩa Zalimoni.
Kĩrĩma kĩa Bashani nĩ kĩrĩma gĩa Kĩhoti; Kĩrĩma kĩa Bashani nĩ kĩrĩma kĩrĩ tũcũmbĩrĩ.
Nĩ kĩĩ gĩtũmaga inyuĩ irĩma irĩ tũcũmbĩrĩ mũrore mũrĩ na ũiru, Kĩrĩma kĩrĩa Kĩhoti athuurĩte gĩtuĩke gĩikaro gĩake? Hatarĩ nganja Yahweh egũtũũra kuo tene na tene.
Ngaari cia Kĩhoti cia mbaara nĩ ngiri makũmi maingĩ, nĩ makiri na makiri. Yahweh nĩ okĩte handũ harĩa hamũre oimĩte Sinai.
Wee waambatire igũrũ; Ũgĩkuua mĩgwate; Ũkĩĩyoera arũme marĩ ta iheo, O na arĩa aremi, nĩguo ũikarage gatagatĩ-inĩ kao, wee Yahu, o wee Kĩhoti.
Yahweh arorathimwo, o we ũtũteithagia mũrigo witũ o mũthenya, Kĩhoti ũrĩa wa ma ũtũhonokagia. (Sela)
Harĩ ithuĩ-rĩ, El witũ nĩ El ũhonokanagia; Na Yahweh Mwathi Ũrĩa Mũnene nĩ ahonokagia andũ kuuma harĩ gĩkuũ.
Kĩhoti nĩ ekũhehenja mĩtwe ya thũ ciake, Ahehenje mũtwe wa mũndũ o wothe ũthiaga na mbere na mahĩtia make.
Yahweh oigĩte ũũ: “Nĩ ngũmacokia kuuma Bashani; Nĩ ngũmacokia kuuma iria-inĩ kũrĩa kũriku mũno,
Nĩgetha kũgũrũ gwaku kũhumbĩrũo nĩ thakame Na rũrĩmĩ rwa ngui ciaku rũgĩe na rwĩga rwaruo kuuma harĩ thũ.”
Monaga kĩrĩndĩ kĩa andũ aku gĩgĩthiĩ kĩrũmanĩrĩire, wee Kĩhoti, Kĩrĩndĩ kĩa El wakwa, o we Mũthamaki wakwa, kĩerekeire handũ harĩa hamũre.
Aini mathiaga matongoretie, nao arĩa marahũũra inanda cia ndigi makamoima thutha; Na gatagatĩ-inĩ kao gũkoragwo na airĩtu marainia manyanga.
Rathimai Kĩhoti, mũrĩ cĩũnganoinĩ; Rathimai Yahweh, inyuĩ muumĩte Kĩhumo-inĩ kĩa Isiraeli.
Mũhĩrĩga ũrĩa mũnini wa Benjamini nĩ ũramatooria, O nao anene a Yahuda hamwe na rũkundi rwake, Anene a Zebuluni, na anene a Nafitali.
Kĩhoti waku nĩ oigĩte atĩ nĩ ũrĩkoragwo na hinya. Onania hinya waku, wee Kĩhoti, o wee wĩkĩte maũndũ nĩ ũndũ witũ.
Nĩ ũndũ wa hekarũ yaku ĩrĩa ĩrĩ thĩinĩ wa Yahrushalayim, Athamaki nĩ marĩkũrehagĩra iheo.
Girĩrĩria nyamũ cia gĩthaka iria cikaraga mathanjĩ-inĩ, Rũũru rwa ndegwa na njaũ ciacio, O nginya rĩrĩa ikundi cia andũ irĩinamĩrĩra irehe icunjĩ cia betha. No nĩ ahurunjaga ikundi cia andũ iria ciendete mbaara.
Indo cia gĩcango nĩ ikũrehwo kuuma Misiri; Andũ a Kushi nĩ mekũhiũha nĩguo mahe Kĩhoti iheo.
Inyuĩ mothamaki ma thĩ, inĩrai Kĩhoti, Inai nyĩmbo mũgooce Yahweh, (Sela)
Inĩrai ũrĩa ũtuĩkanagĩria igũrũ mũno kuuma o tene. Atĩrĩrĩ, arurumaga na mũgambo wake, mũgambo wake mũnene.
Ĩtĩkĩrai atĩ Kĩhoti nĩ arĩ hinya. Ũhoti wake mũnene ũrĩ igũrũ rĩa Isiraeli, Na hinya wake ũrĩ matu-inĩ.
Kĩhoti nĩ wa magegania arĩ handũ hake harĩa hamũre na harĩ riri. Nĩwe El wa Isiraeli, O we ũheaga andũ hinya na ũhoti. Kĩhoti arorathimwo.