Thaburi 77

Nĩ ndakaĩre Kĩhoti na mũgambo wakwa; Nĩ ndakaĩre Kĩhoti, nake akĩnjigua.

Mũthenya ũrĩa ndarĩ na mĩtangĩko ndethire Yahweh. Ũtukũ ngĩtambũrũkia moko makwa kũrĩ we itegũtigithĩria. No ndiaiguire ngĩũmĩrĩrio.

Rĩrĩa ndaririkanire Kĩhoti, nĩ gũcaya ndacaire; Nĩ ndatangĩkaga na ngorũo nĩ hinya. (Sela)

Nĩ ũgiragĩrĩria imone ciakwa itikahingĩke; Nĩ ndangĩkĩte na ndingĩhota kwaria.

Nĩ ndĩĩciragia ũhoro wa matukũ marĩa ma tene, Ngeciria ũhoro wa mĩaka ya tene mũno.

Ũtukũ nĩ ndirikanaga rwĩmbo rwakwa; Ngecũrania ngoro-inĩ yakwa; Ngathuthuria na kĩyo.

Hihi Yahweh egũtũũra atũtiganĩirie tene na tene? Kaĩ gũtarĩ hĩndĩ ĩngĩ agaatũiguĩra tha?

Tha ciake-rĩ, kaĩ ciathirire tene na tene? Kaĩ gũtarĩ rũciaro rũkoona kĩĩranĩro gĩake gĩkĩhinga?

El-rĩ, kaĩ ariganĩirũo kũiguanĩra tha, Kana hihi marakara make nĩ matũmĩte tha ciake inyihe? (Sela)

Hihi no mũhaka njikare ngiugaga atĩrĩ: “Ũndũ ũyũ nĩguo ũtũmaga ndangĩke: Ũrĩa ũrĩ Igũrũ Mũno nĩ acenjetie mwĩkĩre wake wa maũndũ gũtwerekera”?

Nĩ ngũririkana mawĩra ma Yahu; Nĩ ngũririkana ciĩko ciaku cia magegania iria wekire tene.

Na nĩ ngwĩcũrania igũrũ rĩgiĩ mawĩko maku mothe Na ndĩcũranie ũhoro wa maũndũ marĩa wĩkĩte.

Njĩra ciaku nĩ nyamũre, wee Kĩhoti. El, nĩ Kĩhoti ũrĩkũ ũngĩ mũnene tawe?

Wee nĩwe El ũrĩa wĩkaga maũndũ ma magegania. Nĩ ũguũrĩirie ikundi cia andũ hinya waku.

Nĩ ũhonoketie andũ aku kũgerera hinya waku, Ũkahonokia ciana cia Jakubu na cia Jusufu. (Sela)

Maĩ nĩ maakuonire, wee Kĩhoti; Maĩ nĩ maakuonire na magĩtangĩka. Namo maĩ marĩa mariku makĩinaina.

Matu nĩ mooiririe mbura. Igũrũ matu-inĩ gũkĩruruma, Na mĩguĩ yaku ĩkĩrathũka kũndũ na kũndũ.

Mũgambo wa mũrurumo waku watariĩ ta wa magũrũ ma ngaari cia mbarathi; Nayo mĩhenũko ya rũheni ĩkĩmũrĩka thĩ ĩrĩa ĩikaragwo; Thĩ ĩkĩinaina na ĩgĩthingitha.

Njĩra yaku yatuĩkanĩirie iria-inĩ, Na gacĩra gaku gagĩtuĩkanĩria maĩ-inĩ maingĩ; No makinya maku matingĩonekire harĩa maagereire.

Watongoririe andũ aku o ta rũũru, Marĩ rungu rwa Musa na Haruni.