Thaburi 78
Thikĩrĩriai watho wakwa, inyuĩ andũ akwa; Tegai gũtũ kwanyu mũigue ciugo cia kanua gakwa.
Nĩ ngũtumũra kanua gakwa njarie na thimo. Nĩ ngũgweta ndaĩ cia mahinda ma tene.
Maũndũ marĩa tũiguĩte na tũkamenya, Marĩa tũtaarĩirio nĩ maithe maitũ,
Tũtikũmahitha ciana ciao; Nĩ tũkeera rũciaro rũrĩa rũgooka Ciĩko cia kũgoocwo cia Yahweh o hamwe na hinya wake, Maũndũ ma magegania marĩa ekĩte.
Nĩ aahandire kĩririkania thĩinĩ wa Jakubu Na akĩiga watho thĩinĩ wa Isiraeli; Agĩatha maithe maitũ ma tene Mamenyithie ciana ciao maũndũ macio,
Nĩgetha rũciaro rũrĩa rũgooka, Ciana iria itarĩ iraciarũo, imenye maũndũ macio. Nacio ikeera ciana ciacio.
Nĩgetha ciige mwĩhoko wacio harĩ Kĩhoti. Itikanariganĩrũo nĩ mawĩra ma El No irũmagĩrĩre maathani make.
Nacio itikanahaane ta maithe ma cio ma tene, Rũciaro rũrĩa rwarĩ rũremi na rũtaarĩ rwathĩki, Rũciaro rwarĩ na ngoro ĩtakindĩirie Na roho waruo ndwarĩ mwĩhokeku harĩ El.
Aefiraimu nĩ meehaarĩirie na ũta, No makĩhũndũka mũthenya wa mbaara.
Matiarũmirie kĩrĩkanĩro gĩa Kĩhoti Na nĩ maaregire kũrũmĩrĩra watho wake.
Ningĩ nĩ maariganĩirũo nĩ maũndũ marĩa eekĩte, Mawĩra make ma magegania marĩa aamonetie.
Nĩ eekĩte maũndũ ma magegania maithe mao ma tene makĩĩyonagĩra, Thĩinĩ wa bũrũri wa Misiri, gĩcigo-inĩ kĩa Zoani.
Aagayanirie iria nĩguo matuĩkanĩrie thĩinĩ warĩo, Na agĩtũma maĩ marũgame ta rũthingo.
Mũthenya aamatongoragia na itu Naguo ũtukũ wothe akamatongoria na ũtheri wa mwaki.
Nĩ aatũranirie ndwaro cia mahiga werũ-inĩ, Akĩreka manyue maĩ nginya maiganie ta arĩ maĩ ma kũndũ kũrĩa kũriku.
Nĩ aatũmire tũrũũĩ tuume ndũmba-inĩ ya ihiga Na agĩtũma maĩ matherere ta njũũĩ.
Ĩndĩ o magĩthiĩ na mbere kũmwĩhĩria Na njĩra ya kũremera Ũrĩa ũrĩ Igũrũ Mũno marĩ kũu werũ-inĩ;
Makĩgeria El ngoro-inĩ ciao Na njĩra ya gwĩtia irio iria meeriragĩria.
Nĩ ũndũ ũcio makĩaria ciugo cia gũũkĩrĩra Kĩhoti, Makiuga atĩrĩ: “Hihi El no ahote kwara metha werũ-inĩ?”
Nĩ aagũthire rwaro rwa ihiga Namo maĩ magĩtherera na tũrũũĩ tũkĩiyũra. No makĩũria atĩrĩ: “Hihi no ahote gũtũhe nginya mũgate, Kana ahe andũ ake nyama?”
Rĩrĩa Yahweh aaiguire ciugo ciao, akĩrakara mũno; Agĩtũma mwaki ũtharĩkĩre Jakubu, Na marakara make magĩũkĩrĩra Isiraeli
Tondũ mationanirie wĩtĩkio harĩ Kĩhoti; Matiehokire ũhoti wake wa kũmahonokia.
Nĩ ũndũ ũcio agĩatha matu marĩa marĩ igũrũ, Na akĩhingũra mĩrango ya igũrũ.
Agĩikara akĩmoiragĩria maana nĩguo marĩe; Akĩmahe ngano ya igũrũ.
Andũ makĩrĩa mũgate wa arĩa marĩ hinya; Akĩmahe wa kũigana ũrĩa ũngĩamahũnirie.
Aatũmire igũrũ kũgĩe rũhuho rwa mwena wa irathĩro Na agĩtũma rũhuho rwa mwena wa mũhuro rũhurutane nĩ ũndũ wa hinya wake.
Akĩmaikũrũkĩria nyama nyingĩ ta rũkũngũ, Nyoni nyingĩ ta mũthanga wa iria-inĩ.
Agĩtũma igũe thĩinĩ wa kambĩ yake, Gũthiũrũrũkĩria hema ciake.
Nao makĩrĩa makĩhũna mũno; Aamaheire kĩrĩa meeriragĩria.
No matanahingia merirĩria mao biũ, O marĩ na irio tũnua-inĩ twao,
Marakara ma Kĩhoti makĩmokĩrĩra. Akĩũraga arũme arĩa maarĩ na hinya gatagatĩ-inĩ kao; Akĩniina anake a Isiraeli.
O na ekĩte ũguo, nĩ meehirie o na makĩria, Na mationanirie wĩtĩkio harĩ mawĩra make ma magegania.
Nĩ ũndũ ũcio agĩtũma matukũ mao makinye mũthia o ta arĩ mĩhũmũ, Na agĩtũma mĩaka yao ĩkinye mũthia kũgerera maũndũ ma hinahi ma kũmakania.
No nĩ maamũcaragia rĩrĩa rĩothe oraga amwe ao; Nĩ maacokaga magetha El,
Makĩririkanaga atĩ Kĩhoti nĩwe warĩ Rwaro Rwao rwa Ihiga Na atĩ El Elyon nĩwe warĩ Mũkũũri wao.
No nĩ maageririe kũmũheenia na kanua kao Na makĩmũheenia na rũrĩmĩ rwao.
Ngoro yao ndĩarũngĩrĩire wega harĩ we; Na matiarĩ akĩndĩrĩku biũ kĩrĩkanĩro-inĩ gĩake.
No we nĩ aaringagwo nĩ tha; Nĩ aamohagĩra mehia mao na ndaamaniinaga. Kaingĩ nĩ aagiragĩrĩria marakara make Handũ ha kwarahũra mang’ũrĩ make mothe.
Tondũ nĩ aaririkanaga atĩ maarĩ o andũ tu, Rũhuho rũrĩa rũhurutanaga rũgathiĩ na rũticokaga.
Nĩ kaingĩ maamũremagĩra marĩ werũ-inĩ Na makamũiguithia ũũru kũu werũ-inĩ.
Nĩ maageragia El maita maingĩ, Na magatũma Ũrĩa Mwamũre wa Isiraeli anyitwo nĩ kĩeha.
Matiaririkanaga hinya wake, Mũthenya ũrĩa aamahonokirie kuuma harĩ thũ,
Ũrĩa oonanirie imenyithia ciake bũrũri-inĩ wa Misiri Na ciama ciake gĩcigo-inĩ kĩa Zoani,
Na ũrĩa aagarũrire maĩ ma mĩtaro ya Misri magĩtuĩka thakame Andũ makĩremwo kũnyua maĩ ma tũrũũĩ twao.
Akĩmatũmĩra ngi nyingĩ nĩguo imarũme Na akĩmarehera ciũra imanyamarie.
Aaneanire mĩmera yao kũrĩ ngigĩ iria irĩ mũkoroko, Na maciaro ma wĩra wao akĩmaneana kũrĩ ngigĩ iria ithiaga irĩ gĩkundi.
Nĩ aanangire mĩthabibũ yao kũgerera mbura ya mbembe Na mĩkũyũ yao kũgerera mbembe cia mbura.
Aahũũrire nyamũ ciao cia gũkuua mĩrigo na mbura ya mbembe Na akĩringa mahiũ mao na rũheni.
Akĩmaitũrũrĩra marakara make mahiũ, Mathũgũta na mang’ũrĩ na marũrũ, Mbũtũ cia araika ikĩmarehera mwanangĩko.
Nĩ aatemeire marakara make njĩra. Ndaamahonokirie kuuma harĩ gĩkuũ; Na akĩmaneana harĩ mũrimũ mũũru.
Mũthia-inĩ akĩniina marigithathi mothe ma Misiri, Kĩambĩrĩria kĩa ũhoti wao wa ũciari hema-inĩ cia Hamu.
Agĩcoka akĩruta andũ ake kuo o ta rũũru Na akĩmatongoria ta ng’ondu kũu werũ-inĩ.
Aamatongoririe na njĩra ya thayũ, Na matiarĩ na guoya; Thũ ciao ikĩhumbĩrũo nĩ iria.
Na akĩmatwara gĩcigo-inĩ gĩake kĩamũre, Gĩcigo kĩrĩ irĩma kĩrĩa guoko gwake kwa ũrĩo kwegwatĩire.
Akĩingata ndũrĩrĩ ciehere mbere yao; Akĩmagaĩra igai kũgerera rũrigi rwa gũthima; Agĩtũma mĩhĩrĩga ya Isiraeli yambĩrĩrie gũikara mĩciĩ-inĩ yao.
No nĩ maathiire na mbere kũgeria Kĩhoti Ũrĩa ũrĩ Igũrũ Mũno, na kũmũremera; Matiathikĩrĩirie iririkania ciake.
Ningĩ nĩ maamũtiganĩirie na makĩaga wĩhokeku o ta maithe mao ma tene. O ta ũta mũregeru, matiarĩ a kwĩhokwo.
Nĩ maamũrakaragia nĩ ũndũ wa kũndũ kwao kũrĩa gũtũũgĩru gwa gũthathaĩria, Na makĩarahũra mathũgũta make nĩ ũndũ wa mĩhianano yao ya gwacũhio.
Kĩhoti nĩ aaiguire ũhoro ũcio na akĩrakara mũno, Nĩ ũndũ ũcio agĩtiganĩria Isiraeli biũ.
Mũthia-inĩ agĩtiganĩria gĩikaro kĩrĩa kĩamũre kĩarĩ Shilo, Hema ĩrĩa aaikaraga gatagatĩ-inĩ ka andũ.
Nĩ aarekire kĩndũ kĩrĩa kĩarũgamagĩrĩra hinya wake gĩtahwo; Akĩreka riri wake ũkorũo moko-inĩ ma thũ.
Akĩneana andũ ake harĩ rũhiũ rwa njora Na akĩrakario mũno nĩ igai rĩake.
Anake ake magĩcinwo na mwaki, Nao airĩtu ake makĩaga kũinĩrũo nyĩmbo cia ũhiki.
Athĩnjĩri-Yahweh ake makĩũragwo na rũhiũ rwa njora, Na atumia ao a ndigwa matiarĩrire nĩ ũndũ wao.
Nake Yahweh akĩarahũka ta oimĩte toro, Ta mũndũ karaũ agĩkayũrũrũka nĩ ũndũ wa kũnyua ndibei.
Na agĩcokithia thũ ciake na thutha; Agĩtũma igĩe na gĩconoko gĩa gũtũũra.
Nĩ aaregire hema ya Jusufu; Ndaathuurire mũhĩrĩga wa Efiraimu.
No nĩ aathuurire mũhĩrĩga wa Yahuda, Kĩrĩma gĩa Zayuni kĩrĩa endete.
Aatũmire handũ hake harĩa hamũre hatũũre o ta igũrũ, O ta thĩ ĩrĩa ahandĩte ĩtũũre tene na tene.
Aathuurire Daudi ndungata yake Na akĩmũruta ciugũ-inĩ cia ng’ondu,
Akĩmũruta wĩra-inĩ wa kũrũmbũiya ng’ondu iria ciongithagia; Akĩmũtua mũrĩithi wa Jakubu, andũ ake, Na wa Isiraeli, igai rĩake.
Nake akĩmarĩithia arĩ na wĩkindĩru wa ngoro, Na akĩmatongoria na moko marĩ na ũũgĩ.