Thaburi 79

Tarora Kĩhoti, andũ a ndũrĩrĩ nĩ matharĩkĩire igai rĩaku; Nĩ mathahĩtie hekarũ yaku nyamũre; Matũmĩte Yahrushalayim ĩtuĩke hĩba ya mwanangĩko.

Ciimba cia ndungata ciaku maciheete nyoni cia rĩera-inĩ ituĩke irio Na mĩĩrĩ yao makamĩikĩria nyamũ cia gĩthaka cia gũkũ thĩ.

Maitangĩte thakame yao o ta maĩ gũthiũrũrũka Yahrushalayim, Na gũtirĩ mũndũ ũtigarĩte wa kũmathika.

Tũtuĩkĩte kĩndũ gĩa kũnyũrũrio nĩ andũ arĩa tũriganĩtie nao; Andũ arĩa matũthiũrũrũkĩirie matũthekagĩrĩra na magatũnyarara.

Nĩ nginya rĩ, Yahweh, ũgũtũũra ũrakarĩte? Hihi nĩ nginya tene na tene? Marakara maku megũtũũra makanĩte o ta mwaki nginya rĩ?

Itũrũra mang’ũrĩ maku harĩ ndũrĩrĩ iria itakũĩ Na harĩ mothamaki marĩa matakayagĩra rĩĩtwa rĩaku.

Tondũ nĩ matamburĩte Jakubu Na magatũma bũrũri wake ũtuĩke kũndũ gũtiganĩrie.

Ndũgatũtuĩre nĩ ũndũ wa mahĩtia ma maithe maitũ ma tene. Tũiguĩre tha na ihenya, Nĩ gũkorũo nĩ tũhinyĩrĩirio mũno.

Tũteithie, wee Kĩhoti wa ũhonokio witũ, Nĩ ũndũ wa rĩĩtwa rĩaku itũũgĩru; Tũhonokie na ũtũthambie tũthirwo nĩ mehia maitũ nĩ ũndũ wa rĩĩtwa rĩaku.

Nĩ kĩĩ kĩngĩgĩtũma ndũrĩrĩ ciũrie atĩrĩ: “Kĩhoti wao arĩ kũ?” Reke ndũrĩrĩ imenye tũkĩĩyonagĩra na maitho maitũ Atĩ thakame ĩrĩa ĩitĩtwo ya ndungata ciaku nĩ ĩrĩhĩirio.

Igua gũcaya kwa mũndũ ũrĩa wohetwo. Hũthĩra hinya waku mũingĩ kũhonokia arĩa matuĩrĩirũo kũũragwo.

Andũ arĩa tũriganĩtie nao maherithie maita mũgwanja Nĩ ũndũ wa inyũrũri iria makũnyũrũrĩtie nacio, wee Yahweh.

Na ithuĩ andũ aku, o ithuĩ rũũru rũrĩa ũrĩithagia, Tũgũtũũra tũgũcokagĩria ngatho tene na tene; Na nĩ tũrĩkũgoocaga kuuma njiarũa nginya njiarũa.