Thaburi 80

Wee Mũrĩithi wa Isiraeli, thikĩrĩria, O wee ũtongoragia Jusufu o ta rũũru. Wee ũikarĩire gĩtĩ kĩa ũnene igũrũ rĩa akerubi-rĩ, Cangarara.

Mbere ya Efiraimu na Benjamini na Manase, Arahũra hinya waku; Ũka ũtũhonokie.

Rĩu Kĩhoti, tũcokererie; Reke ũthiũ waku ũtwarĩre, nĩgetha tũhonoke.

Wee Yahweh Kĩhoti mũnene wa ita, nĩ nginya rĩ ũgũtũũra ũrakarĩte rĩrĩa andũ aku marakũhoya?

Ũmaheaga maithori marĩe ta mũgate, Na ũgatũma manyue maithori matarĩ gĩthimi.

Ũrekaga arĩa tũriganĩtie nao marũe nĩ ũndũ witũ; Thũ citũ cikaraga igĩtũnyũrũragia ũrĩa ikwenda.

Wee Kĩhoti mũnene wa ita, tũcokererie; Reke ũthiũ waku ũtwarĩre, nĩgetha tũhonoke.

Nĩ watũmire mũthabibũ uume Misiri. Ũkĩingata ndũrĩrĩ na ũkĩũhanda.

Ũkĩũthereria handũ, Naguo ũkĩgĩa mĩri na ũkĩiyũra bũrũri wothe.

Irĩma ciahumbĩrĩtwo nĩ kĩĩruru kĩaguo, Nayo mĩtarakwa ya Kĩhoti ĩkahumbĩrũo nĩ honge ciaguo.

Honge ciaguo ciakinyĩte o nginya iria-inĩ, Na thuuna ciaguo igakinya Rũũĩ-inĩ.

Nĩ kĩĩ gĩtũmĩte ũmomore thingo cia mahiga cia kũirigĩra mũgũnda wa mĩthabibũ, Ũgatũma arĩa othe marahĩtũka matue matunda maguo?

Ngũrũe cia gĩthaka nĩ ciũthũkangagia, Na nyamũ cia gĩthaka ikaũrĩa.

Twakũũria ũtũcokerere, wee Kĩhoti mũnene wa ita. Rora thĩ ũrĩ kũu igũrũ wone! Rũmbũiya mũthabibũ ũyũ,

Rũhonge rũrĩa guoko gwaku kwa ũrĩo kũhandĩte, Na ũrore rũhonge rũrĩa watũmire rũgĩe na hinya nĩ ũndũ waku wee mwene.

Nĩ rũcinĩtwo na mwaki, rũgatemwo rũkagũa. Andũ nĩ mathiraga nĩ ũndũ wa iherithia rĩaku.

Guoko gwaku kũrotiirĩrĩra mũndũ ũrĩa ũrĩ guoko-inĩ gwaku kwa ũrĩo, Gũtiirĩrĩre mũrũ wa mũndũ ũrĩa wee ũtũmĩte agĩe na hinya nĩ ũndũ waku mwene.

Na ithuĩ tũtigũgũtiganĩria. Tũtũũrie muoyo nĩgetha tũkayagĩre rĩĩtwa rĩaku.

Wee Yahweh Kĩhoti mũnene wa ita, tũcokererie; Reke ũthiũ waku ũtwarĩre, nĩgetha tũhonoke.