Thaburi 83

Atĩrĩrĩ El, ndũgakire; Ndũgaikare ũtekwaria kana wage kuoya ikinya, wee Kĩhoti.

Tondũ rĩrĩ, thũ ciaku irĩ na mbugĩrĩrio; Arĩa magũthũire marĩ na mwĩtĩo.

Mabangaga na hitho marĩ na wara ũrĩa megũũkĩrĩra andũ aku; Magaciira gũũkĩrĩra andũ aku arĩa wendete.

Moigaga ũũ: “Ũkai tũmaniine marĩ rũrĩrĩ, Nĩgetha rĩĩtwa rĩa Isiraeli rĩtikanaririkanwo rĩngĩ.”

Mathugundaga mũbango marĩ hamwe; Nĩ manyitanĩire nĩguo magũũkĩrĩre

Hema cia Edomu na cia Aishumaeli, Moabi na Ahagari,

Gebali na Amoni na Amaleki, Filistia hamwe na aikari a Turo.

Andũ a Ashuri o nao nĩ manyitanĩire nao; Magateithia ariũ a Loti. (Sela)

Ũromeka o ta ũrĩa wekire Midiani, O ta ũrĩa wekire Sisera na Jabini karũũĩ-inĩ ga Kishoni.

Maaniinĩirũo Eni-doru; Maatuĩkire thumu wa kũnoria thĩ.

Tũma andũ ao arĩa marĩ igweta mahaane ta Orebu na Zeebu Na anene ao mahaane ta Zeba na Zalimuna,

Tondũ mooigire atĩrĩ: “Rekei twĩgwatĩre bũrũri ũrĩa Kĩhoti atũũraga.”

Rĩu Kĩhoti wakwa, reke mahaane o ta rũkũngũ rũrĩa rũgũrũkanagio, ota maragaragara marombũrũo nĩ rũhuho.

Ota mwaki ũrĩa ũcinaga mũtitũ, O ta rũrĩrĩmbĩ rũrĩa rũcinaga irĩma-rĩ,

Ũromathingata na kĩhuhũkanio gĩaku Na ũtũme mamakio nĩ rũhuho rwaku rũnene.

Humbĩra mothiũ mao na gĩconoko, Nĩgetha macarie rĩĩtwa rĩaku, wee Yahweh.

Maroconorithio na matũũre na guoya tene na tene; Maroagĩrũo gĩtĩo na mathire;

Andũ nĩ mamenye atĩ wee, o wee wĩtagwo Yahweh, Wee wiki nowe Ũrĩa ũrĩ Igũrũ Mũno, igũrũ rĩa thĩ yothe.