Thaburi 84

Gĩikaro gĩaku kĩrĩa kĩamũre na kĩrĩ riri kaĩ nĩ kĩega-ĩ! Wee Yahweh mũnene wa ita!

Muoyo wakwa wothe nĩ wĩriragĩria, O na nĩ njũrĩtwo nĩ hinya nĩ ũndũ wa kwĩrirĩria Nja cia Yahweh. Ngoro yakwa na mwĩrĩ wakwa cikũngũyagĩra El ũrĩa ũtũũraga muoyo ikenete.

O na nyoni nĩ yonaga ũikaro kuo Na thũngũrũrũ ĩgaka gĩtara kĩayo, Harĩa ĩreragĩra tũcui twayo Hakuhĩ na kĩgongona gĩaku kĩnene, wee Yahweh mũnene wa ita, Mũthamaki wakwa na Kĩhoti wakwa!

Kũrathimwo nĩ arĩa maikaraga nyũmba-inĩ yaku! Nĩ mathiaga na mbere gũkũgooca. (Sela)

Kũrathimwo nĩ andũ arĩa makwĩhokaga ũmahe hinya, Arĩa ngoro ciao ciĩriragĩria barabara iria nene.

Rĩrĩa mekũhungurĩra gĩtuamba-inĩ kĩrĩa gĩa kĩrĩro, Magĩtuaga kũndũ kũrĩ na matherũkĩro; Nayo mbura ya mbere ĩkaũhumba na irathimo.

Megũthiĩ o makĩongagĩrĩrũo hinya; O ũmwe wao athiaga mbere ya Kĩhoti thĩinĩ wa Zayuni.

Rĩu Yahweh Kĩhoti mũnene wa ita, igua ihoya rĩakwa; Thikĩrĩria, wee Kĩhoti wa Jakubu. (Sela)

Rora, wee ngo itũ na Kĩhoti witũ, Rora ũthiũ wa ũrĩa waku mũitĩrĩrie maguta.

Tondũ mũthenya ũmwe nja-inĩ ciaku nĩ mwega gũkĩra ĩngĩ, ona ĩrĩ mĩthenya ngiri! Niĩ ingĩthuura kũrũgama itonyero-inĩ rĩa hema ya Kĩhoti wakwa, Handũ ha gũikara hema-inĩ cia arĩa imaramari.

Nĩ gũkorũo Yahweh Kĩhoti nĩ mũrũri wa ũtheri na ngo; Nĩ aiguanagĩra tha na akaheana riri. Gũtirĩ ũndũ o na ũmwe mwega Yahweh angĩima Arĩa makoragwo na wĩkindĩru.

Wee Yahweh mũnene wa ita, Kũrathimwo nĩ mũndũ ũrĩa ũkwĩhokaga.