Zakariya 3

Ningĩ akĩnyonia Joshua mũthĩnjĩri-Yahweh ũrĩa mũnene arũgamĩte mbere ya mũraika wa Yahweh, na Shaitani aarũgamĩte guoko-inĩ gwake kwa ũrĩo nĩguo amũũkĩrĩre

Nake mũraika wa Yahweh akĩĩra Shaitani atĩrĩ: “Yahweh arogũkũũma, wee Shaitani, ti itherũ, Yahweh o ũcio ũthuurĩte Yahrushalayim arogũkũũma! Githĩ mũndũ ũyũ ti rũtungu rũrakana rũguthĩtwo kuuma mwaki-inĩ?”

Na rĩrĩ, Joshua eehumbĩte nguo irĩ na gĩko na aarũgamĩte mbere ya mũraika ũcio

Nake mũraika ũcio akĩĩra arĩa maarũgamĩte mbere yake atĩrĩ, “Mũrutei nguo icio ciake irĩ na gĩko.” Agĩcoka akĩmwĩra ũũ, “Ta kĩonee! Nĩ ndatũma mahĩtia maku makweherere, na nĩ ũkũhumbwo nguo njega.”

Nĩ ũndũ ũcio ngiuga atĩrĩ: “Nĩ ekĩrũo kĩremba gĩtheru mũtwe.” Nao makĩmwĩkĩra kĩremba kĩu gĩtheru mũtwe na makĩmũhumba nguo; na mũraika wa Yahweh aarũgamĩte hau hakuhĩ

Mũraika ũcio wa Yahweh agĩcoka akĩĩra Joshua atĩrĩ:

“Yahweh mũnene wa ita ekuuga atĩrĩ, ‘Ũngĩrũmĩrĩra njĩra ciakwa na ũrute mawĩra maku mbere yakwa, nĩ ũgaatungataga ũrĩ mũtuanĩri cira thĩinĩ wa nyũmba yakwa na ũmenyagĩrĩre nja ciakwa; na nĩ ngaagwĩtĩkĩria ũtonyage hamwe na aya marũgamĩte haha.’

“‘Ta thikĩrĩria, wee Joshua Mũthĩnjĩri-Yahweh Ũrĩa Mũnene, wee hamwe na athiritũ aku acio maikaraga thĩ mbere yaku, nĩ gũkorũo andũ aya nĩ kĩmenyithia; Onee, nĩ ngũrehe ndungata yakwa ĩrĩa ĩtagwo Thuuna

Ta rorai ihiga rĩrĩa njigĩte mbere ya Joshua! Igũrũ rĩa ihiga rĩmwe kũrĩ na maitho mũgwanja; na nĩ ngũconga maandĩko igũrũ rĩarĩo,’ ũguo nĩguo Yahweh mũnene wa ita ekuuga, ‘na nĩ ngeeheria mahĩtia ma bũrũri ũcio na mũthenya ũmwe.’

Yahweh mũnene wa ita ekuuga atĩrĩ, “‘mũthenya ũcio, o ũmwe wanyu nĩ ageeta mũndũ ũrĩa ũngĩ oke rungu rwa mũthabibũ wake na rungu rwa mũkũyũ wake.’”